Við viljum að allir nemendur í Kópavogi þrói með sér stafræna hæfni, gagnrýna hugsun og stafræna borgaravitund sem nýtist þeim í námi, daglegu lífi og framtíðarstarfi. Tæknin á að hjálpa þér að læra, skapa, vinna með öðrum og taka þátt í samfélaginu á öruggan og ábyrgan hátt.

Markmið með stafrænni tækni í skólastarfi

Í grunnskólum Kópavogs notum við stafræna tækni til að styðja við nám, sköpun, samskipti og þátttöku. Markmiðið er að þú lærir að nýta tæknina á gagnrýninn, skapandi, öruggan og ábyrgan hátt.

Tækin eru hjálpartæki í námi en ekki markmið í sjálfu sér. Þau eiga að hjálpa þér að afla þekkingar, vinna með öðrum, skapa eigið efni, leysa verkefni og búa þig undir áframhaldandi nám og þátttöku í samfélaginu.

Ábyrg notkun stafrænnar tækni

Spjaldtölvan sem þú ert með er fyrst og fremst námstæki. Þú átt að fara eftir fyrirmælum kennara og starfsfólks skóla um notkun hennar.

Spjaldtölvan þín kemst sjálfkrafa á þráðlausa netið í skólanum sem heitir Kopavogur. Þú skalt ekki reyna að tengjast neinu öðru neti í skólanum. Ef þú ert í vandræðum með að tengjast netinu í skólanum, láttu þá kennara strax vita. Það er ekki leyfilegt að breyta netstillingum í spjaldtölvunni.

• Notaðu tækin fyrst og fremst til náms og verkefnavinnu.
• Farðu eftir leiðbeiningum kennara og starfsfólks.
• Sýndu öðrum virðingu í stafrænum samskiptum.
• Gættu að persónulegum upplýsingum þínum og annarra.
• Nýttu tæknina til sköpunar, samvinnu og lausnaleitar.
• Láttu kennara vita ef þú rekst á efni eða aðstæður sem valda þér óöryggi.

Fyrir utan skólatíma eru það foreldrar sem ráða hvað þú mátt vera lengi í tölvunni. Reyndu að finna hvað er hæfilega mikill tími fyrir þig og farðu eftir þeim reglum sem foreldrar eða forráðamenn þínir setja. Það er heldur ekki sniðugt að vera í spjaldtölvunni á kvöldin fyrir svefntíma. Þá á hún að vera í hleðslu svo þú getir notað hana í skólanum næsta dag.

Stafræn verkfæri í námi

Í skólanum notar þú ýmis stafræn verkfæri til að:

• fá verkefni og áætlanir,
• vinna með öðrum nemendum,
• skila verkefnum,
• fá endurgjöf frá kennurum,
• búa til myndir, hljóð, myndbönd og kynningar,
• halda utan um námið þitt.

Kennarinn leiðbeinir þér um hvaða verkfæri henta hverju verkefni.

Google Classroom er app þar sem kennari getur lagt fyrir verkefni eða sett inn áætlanir og gátlista. Þú getur einnig skilað verkefnum til kennara með þessu appi og fengið það til baka þegar það hefur verið yfirfarið af kennara og metið. Google Classroom er einkum notað á mið- og unglingastigi.

Jamf er notað af Kópavogsbæ til að halda utan um hver er með hvaða spjaldtölvu. Það er hægt að senda námsbækur og öpp í tækið þitt í gegnum þetta kerfi og það sér líka um að þú fáir aðgang að þráðlausa netinu í skólanum. Ef nemandi sækir sér óleyfilegt app eða fiktar í netstillingum spjaldtölvunnar er hægt að sjá það í Jamf.

Hvað er stafræn hæfni?

Stafræn hæfni snýst ekki bara um að kunna að nota tæki. Hún felst líka í að kunna að:

• finna og meta upplýsingar,
• vinna með öðrum á netinu,
• búa til eigið efni,
• vernda persónuupplýsingar,
• sýna ábyrgð í samskiptum,
• nota gervigreind og önnur stafræn verkfæri á gagnrýninn hátt,
• leysa vandamál með hjálp tækni.

Hvað áttu að gera ef það kemur eitthvað fyrir spjaldtölvuna?

Mikilvægt er að þú gætir þess að fara vel með spjaldtölvuna og hafa hana alltaf í hulstrinu því það ver spjaldtölvuna ef hún dettur í gólfið.

Láttu kennarann þinn strax vita ef spjaldtölvan týnist, bilar eða skemmist. Kennarinn sér þá um að láta foreldra þína vita og ef þú þarft að fá aðra spjaldtölvu þá færðu hana eins fljótt og hægt er.

Nánari upplýsingar um bilanir og tjón eru hér.

Samskipti á netinu og stafræn borgaravitund

Þegar þú notar netið ertu hluti af stafrænu samfélagi. Mikilvægt er að:

• sýna öðrum kurteisi og virðingu,
• hugsa áður en þú birtir efni,
• gæta að einkalífi þínu og annarra,
• tilkynna einelti, áreitni eða óviðeigandi efni,
• virða höfundarétt og heimildir,
• vera gagnrýninn á upplýsingar sem þú finnur á netinu.

Markmiðið er að allir nemendur verði ábyrgir, öruggir og virkir þátttakendur í stafrænu samfélagi.

Gervigreind í námi

Í Kópavogi er verið að skoða hvernig gervigreind getur virkað fyrir nám í grunnskóla. Í skólanum gætir þú notað gervigreindarverkfæri til að:

• fá hugmyndir,
• skoða mismunandi lausnir,
• æfa þekkingu og færni,
• styðja við verkefnavinnu.

Þú þarft þó alltaf að:

• hugsa sjálfstætt,
• staðfesta upplýsingar,
• fylgja leiðbeiningum kennara,
• virða persónuvernd og öryggi annarra.

Gervigreind á að styðja við nám en ekki vinna námið fyrir þig. Mikilvægt er fyrir þig að kynna þér Viðmið um notkun gervigreindar í skóla- og frístundastarfi Kópavogs.

Skilmálar vegna afnota af spjaldtölvu

Hér eru nánari umgengnisreglur um spjaldtölvuna sem nefnast Skilmálar vegna afnota af spjaldtölvu.

---