Kópavogsbær hefur á undanförnum árum byggt upp sterka stafræna innviði í skóla- og frístundastarfi allt frá árinu 2015 og tryggt nemendum og starfsfólki gott aðgengi að stafrænum verkfærum. Nú er næsta þróunarskref að fókusa á að nýta þessa innviði með markvissum hætti til að efla stafræna hæfni, stafræna borgaravitund, gervigreindarlæsi, skapandi kennsluhætti og fjölbreytt námsmat.
Stafræn tækni í skólastarfi er ekki markmið í sjálfu sér heldur leið til að styðja við nám, þátttöku, sköpun, samskipti og velferð barna og ungmenna. Við val á tækjum, hugbúnaði og kennsluaðferðum þarf því ávallt að horfa til þess hvaða námsmarkmiðum tæknin þjónar og hvernig hún styður við faglegt starf kennara og nám nemenda.
Allir grunnskólar vinna með Google Workbook for Education skýjalausn og verkfæri þeim tengdum í 5.-10. bekk en áhersla er lögð á að nota Seesaw á yngsta aldursstiginu til að halda utan um námsefni nemenda.
Fyrir nýja kennara þá er einkum unnið með iPad spjaldtölvu og hér farið í helstu grunnatriði í notkun hennar. Verið er að undirbúa verkefni til að skoða mögulega innleiðingu á fartölvum í stað spjaldtölva í elstu bekkjunum og mun niðurstaða þess efnis liggja fyrir vorið 2027.
Markmið með notkun stafrænnar tækni í Kópavogi
Markmið með notkun stafrænnar tækni í grunnskólum Kópavogs er að nemendur þrói með sér þá stafrænu hæfni sem þeir þurfa til náms, samskipta, upplýsingaleitar, sköpunar, lausnaleitar og þátttöku í samfélaginu. Með stafrænni hæfni er átt við hæfni til að nýta stafræna tækni og miðla á gagnrýninn, skapandi, öruggan og ábyrgan hátt.
Áhersla er lögð á að nemendur læri að nota stafræna tækni með tilgangi, taki upplýstar ákvarðanir, sýni ábyrgð í stafrænum samskiptum og þrói með sér hæfni sem nýtist þeim áfram í námi, starfi og samfélagsþátttöku. Þetta á meðal annars við um upplýsingalæsi, stafræna borgaravitund, efnisgerð, samvinnu, persónuvernd, öryggi og ábyrga notkun gervigreindar.
Tækin eru hluti af stærra samhengi
Allir kennarar og nemendur í grunnskólum Kópavogs hafa haft aðgang að stafrænum tækjum og grunnskólar hafa byggt upp reynslu af notkun spjaldtölva, Google skýjalausna og fjölbreyttra skapandi verkfæra í námi og kennslu. Notkun spjaldtölva í grunnskólum Kópavogs er fyrst og fremst skólaþróunarverkefni en ekki tækniverkefni. Reynsla íslenskra og erlendra skóla hefur sýnt að spjaldtölvur styðja við þróun kennsluhátta þegar markmiðin eru aukin fjölbreytni og einstaklingsmiðun og áhersla á sköpun, nýsköpun og valdeflingu nemenda. Hér má lesa nánar um markmið verkefnisins
Í áframhaldandi þróun verður horft til þess hvaða tækjaumhverfi styður best við markmið skólastarfs á hverju aldursstigi. Þar þarf meðal annars að taka mið af stafrænni hæfni nemenda, jöfnu aðgengi, persónuvernd, upplýsingaöryggi, skapandi athafnakostum, áhrifum á vinnuumhverfi kennara og undirbúningi nemenda fyrir áframhaldandi nám.
Stafræn borgaravitund, öryggi og ábyrg notkun
Stafræn borgaravitund er áfram lykilþáttur í stafrænu skólastarfi Kópavogs. Börn og ungmenni þurfa að læra að umgangast stafræna tækni af ábyrgð, virðingu og öryggi. Það er sameiginlegt verkefni skóla og heimila að styðja nemendur í að taka þátt í stafrænu samfélagi á ábyrgan hátt.
Í skólastarfi þarf að leggja áherslu á opna og heiðarlega umræðu um stafræna hegðun, samskipti, netöryggi, miðlalæsi, persónuvernd og gagnrýna hugsun. Markmiðið er að nemendur verði ábyrgir netnotendur sem kunna að nýta tæknina til náms, sköpunar og þátttöku, en jafnframt að setja mörk, meta upplýsingar og gæta að eigin öryggi og annarra.
Það sama á við um spjaldtölvur. Boð og bönn virka sjaldnast betur en opin og heiðarleg samræða sem einkennist af gagnkvæmri virðingu. Þegar spjaldtölvur eru afhentar vinna nemendur að sáttmála um notkun spjaldtölvanna. Kópavogsbær í samstarfi við Langholtsskóla og Miðstöð menntunar og skólaþjónustu hefur opnað vef með námsefni því til stuðnings. Vefurinn var formlega opnaður haustið 2025 og heitir Vitundin.is
Ábyrg og gagnreynd notkun menntatækni
Við val og innleiðingu á menntatækni og kennsluhugbúnaði skal horfa til þess hvort lausnir styðji við skýr námsmarkmið, hafi kennslufræðilegt gildi, uppfylli kröfur um persónuvernd og öryggi og byggi á rannsóknum, gögnum eða reynslu sem sýnir að þær styðji við markmið skólastarfs.
Kennarar eru hvattir til að velja stafræn verkfæri með það að leiðarljósi að þau auki möguleika nemenda til náms, sköpunar, samvinnu og þátttöku. Breytingar á tækjaumhverfi eða hugbúnaði eiga ekki að þrengja að námsleiðum nemenda heldur styðja við fjölbreyttari og markvissari kennsluhætti.
Stuðningur við kennara og faglegt starfsumhverfi
Stafræn þróun skólastarfs þarf að styðja við faglegt starf kennara og draga úr óþarfa umsýslu. Við mótun framtíðaráætlunar verður því horft sérstaklega til þess hvernig tæki, hugbúnaður og stafrænir innviðir geta stutt kennslu, námsmat, samvinnu, aðgengi og skilvirkt daglegt vinnuflæði skóla.
Kennarar geta áfram leitað stuðnings innan skólanna, til deildarstjóra í upplýsingatækni og til kennsluráðgjafa á grunnskóladeild sem styðja við þróun kennsluhátta og notkun stafrænnar tækni í skólastarfi.
Endurmenntun og sameiginleg þróun
Menntabúðir og önnur endurmenntun eru mikilvægur vettvangur fyrir kennara til að deila reynslu, kynnast nýjum leiðum og þróa stafræna kennsluhætti í samstarfi við aðra. Þar gefst tækifæri til að tengja hagnýta notkun tækni við markmið um stafræna hæfni, skapandi nám, stafræna borgaravitund og ábyrga notkun menntatækni.
Mælt er með að allir kennarar skrái sig inn Facebook-hópinn Spjaldtölvur í grunnskólum Kópavogs þar sem hægt er að afla sér fróðleiks og skiptast á skoðunum.
Vegna appakaupa er kennurum bent á að hafa samband við deildarstjóra í upplýsingatækni í sínum skóla og hér er listi yfir hluta þeirra appa sem notuð eru í námi og kennslu.
Ef spjaldtölva verður fyrir tjóni eða týnist.
UT deildarstjóri í hverjum skóla aðstoðar í þessum málum. Nánar um það hér.
Notkunarskilmálar kennara
Uppfært í ágúst 2026